விவசாய நிலங்கள் அருகே கொட்டப்படும் தார் சாலை கழிவுகள்; நடவடிக்கை எடுக்க பொதுமக்கள் கோரிக்கை.

கடத்தூர், ஜூன். 04:

தருமபுரி மாவட்டம், பாப்பிரெட்டிப்பட்டி வட்டம், இராணிமூக்கனூர் ஊராட்சிக்கு உட்பட்ட இராணிமூக்கனூர் முதல் பாசாரப்பட்டி வரை புதிய தார் சாலை அமைக்கும் பணிகளை வெள்ளியங்கிரி & கோ என்ற தனியார் நிறுவனம் மேற்கொண்டு வருகிறது.

இந்தப் பணிக்காக பழைய தார் சாலை பெயர்த்து அகற்றப்பட்ட நிலையில், அந்த தார் சாலை கழிவுகள் சாலையின் இருபுறங்களிலும் உள்ள விவசாய நிலங்கள் அருகே கொட்டப்பட்டுள்ளதாக அப்பகுதி பொதுமக்கள் மற்றும் சமூக ஆர்வலர்கள் குற்றம்சாட்டியுள்ளனர்.

சாலை அகற்றும்போது கிடைக்கும் தார் கழிவுகளை முறையாக அகற்றி பாதுகாப்பான இடங்களில் சேமிக்க வேண்டும். ஆனால், அவற்றை விவசாய நிலங்கள் மற்றும் பொதுமக்கள் பயன்படுத்தும் பகுதிகளின் அருகே கொட்டியிருப்பது சுற்றுச்சூழலுக்கு பாதிப்பை ஏற்படுத்தும் என கூறப்படுகிறது.

தார் கழிவுகளில் உள்ள சில வேதிப்பொருட்கள் மண்ணில் கலந்து அதன் இயற்கை வளத்தை பாதிக்கக்கூடும். இதனால் விவசாய நிலங்களின் உற்பத்தித் திறன் குறையும் அபாயம் உள்ளது. மேலும், மழைக்காலங்களில் இந்த கழிவுகளில் இருந்து வெளியேறும் ரசாயனங்கள் நிலத்தடி நீருடன் கலந்து குடிநீர் மற்றும் பாசன நீரின் தரத்தையும் பாதிக்கலாம் என சுற்றுச்சூழல் ஆர்வலர்கள் எச்சரிக்கின்றனர்.

அதேபோல், தார் கழிவுகள் வெயிலில் உலரும்போது தூசியாக மாறி காற்றில் பரவுவதால் பொதுமக்களுக்கு சுவாசப் பிரச்சினைகள் ஏற்படும் வாய்ப்பும் உள்ளது. விவசாய நிலங்களுக்கு அருகில் இத்தகைய கழிவுகளை குவித்து வைப்பது பயிர்களின் வளர்ச்சியையும் பாதிக்கக்கூடும் என்று தெரிவிக்கப்படுகிறது.

சுற்றுச்சூழல் பாதுகாப்புச் சட்டம் 1986, நீர் மாசுபாடு தடுப்புச் சட்டம் 1974, காற்று மாசுபாடு தடுப்புச் சட்டம் 1981, திடக்கழிவு மேலாண்மை விதிகள் 2016 மற்றும் கட்டுமான மற்றும் இடிப்பு கழிவு மேலாண்மை விதிகள் 2016 ஆகிய சட்டங்களின்படி கட்டுமானப் பணிகளில் உருவாகும் கழிவுகளை முறையாக கையாள வேண்டும். திறந்தவெளியில் அல்லது விவசாய நிலங்கள் அருகே கொட்டுவது விதிமீறலாக கருதப்படலாம் என கூறப்படுகிறது.

மேலும், பழைய தார் சாலை கழிவுகளை மறுசுழற்சி செய்து மீண்டும் சாலைப் பணிகளில் பயன்படுத்த வேண்டும் என்பதும் சாலைப் பணிகளுக்கான வழிகாட்டுதல்களில் குறிப்பிடப்பட்டுள்ளது. எனவே, கொட்டப்பட்டுள்ள தார் சாலை கழிவுகளை உடனடியாக அப்புறப்படுத்த மாவட்ட நிர்வாகம் நடவடிக்கை எடுக்க வேண்டும் என்றும், தமிழ்நாடு மாசுக் கட்டுப்பாட்டு வாரியம் மூலம் மண் மற்றும் நிலத்தடி நீர் பாதிப்பு குறித்து ஆய்வு நடத்த வேண்டும் என்றும் பொதுமக்கள் மற்றும் சமூக ஆர்வலர்கள் கோரிக்கை விடுத்துள்ளனர். மேலும், விதிமீறல் உறுதியானால் சம்பந்தப்பட்ட நிறுவனம் மீது உரிய நடவடிக்கை எடுக்க வேண்டும் என்றும் அவர்கள் வலியுறுத்தியுள்ளனர்.