முன்னாள் சட்டமன்ற உறுப்பினர் ஆர். சின்னசாமி மரணம் – முதல்வர் ஸ்டாலின் இரங்கல்.

சென்னை – ஆகஸ்ட் 28, 2025 (ஆவணி 12)

தருமபுரி சட்டமன்ற தொகுதியின் முன்னாள் உறுப்பினரும், ஒருங்கிணைந்த தருமபுரி மாவட்ட திமுக கழகத்தின் முன்னாள் செயலாளருமான திரு. ஆர். சின்னசாமி அவர்கள் மறைந்த செய்தி வருத்தத்தையும் துயரத்தையும் ஏற்படுத்தியுள்ளது.

மாண்புமிகு தமிழ்நாடு முதலமைச்சர் திரு. மு.க. ஸ்டாலின் அவர்கள் தனது இரங்கல் அறிக்கையில், “1971, 1984 மற்றும் 1989-ஆம் ஆண்டுகளில் திமுக சார்பில் தருமபுரி சட்டமன்ற தொகுதியில் வெற்றி பெற்று மக்களின் நம்பிக்கையை பெற்றவர் திரு. சின்னசாமி. மூன்று முறை சட்டமன்ற உறுப்பினராக இருந்த அவர், தருமபுரி மாவட்ட வளர்ச்சிக்காக குறிப்பிடத்தக்க பணிகளை ஆற்றியவர். மூத்த முன்னோடியாகவும், கழகத்திற்கு வழிகாட்டிய முதுபெரும் உறுப்பினராகவும் விளங்கிய திரு. சின்னசாமியின் மறைவு, தருமபுரி மக்களுக்கும், திமுகக்கும் பெரும் இழப்பாகும்” என குறிப்பிட்டுள்ளார்.

மேலும், “அன்னாரை இழந்து வாடும் குடும்பத்தினருக்கும், கழகத்தினருக்கும், பொதுமக்களுக்கும் எனது ஆழ்ந்த இரங்கலைத் தெரிவித்துக்கொள்கிறேன்” என முதல்வர் ஸ்டாலின் தெரிவித்தார்.