தருமபுரி மாவட்டத்தில் விநாயகர் சதுர்த்தி – சிலைகள் கரைக்க வழிகாட்டு நெறிமுறை மற்றும் இடங்கள் விவரம் வெளியீடு.

தருமபுரி, ஆகஸ்ட் 01 | ஆடி 15 - 

வரவிருக்கும் விநாயகர் சதுர்த்தி விழாவினை முன்னிட்டு, விநாயகர் சிலைகளை நீர்நிலைகளில் கரைப்பது தொடர்பாக மத்திய மாசுக் கட்டுப்பாட்டு வாரிய வழிகாட்டுதல்களின் படி, மாவட்ட நிர்வாகம் குறிப்பிட்டுள்ள இடங்களில் மட்டுமே சிலை கரைப்பை மேற்கொள்ளுமாறு தருமபுரி மாவட்ட ஆட்சித்தலைவர் திரு. ரெ. சதீஸ், இ.ஆ.ப., அவர்கள் அறிவித்துள்ளார்.

தமிழகம் தொன்றுதொட்டு சுற்றுச்சூழலை பாதுகாக்கும் சிறந்த மாநிலமாக விளங்கி வருவதாக அவர் குறிப்பிட்டார். நீர்நிலைகள் குடிநீர் ஆதாரமாக இருப்பதால், அவற்றை பாதுகாக்கும் பொறுப்பு அனைவருக்கும் இருப்பதாகவும், எனவே சுற்றுச்சூழலுக்கு உகந்த மூலப்பொருட்களால் செய்யப்பட்ட சிலைகள் மட்டுமே நீர்நிலைகளில் கரைக்க அனுமதிக்கப்படும் எனவும் தெரிவித்தார்.

ஆட்சித்தலைவர் மேலும் கூறியதாவது: களிமண், பிளாஸ்டர் ஆஃப் பாரிஸ் (PoP), பிளாஸ்டிக், தெர்மாகோல் ஆகிய கலவையற்ற, சுற்றுச்சூழலுக்கு பாதிப்பு இல்லாத பொருட்களால் செய்யப்பட்ட சிலைகள் மட்டுமே கரைக்கப்பட வேண்டும். சிலைகளின் ஆபரணங்களுக்கு உலர்ந்த மலர், வைக்கோல் போன்ற இயற்கை பொருட்கள் பயன்படுத்தப்படலாம். நச்சுத்தன்மையுள்ள சாயங்கள், எண்ணெய் அடிப்படையிலான பூச்சுகள், செயற்கை இரசாயன வண்ணங்கள் பயன்படுத்தக் கூடாது. அதற்குப் பதிலாக நீர் சார்ந்த, மக்கக்கூடிய, நச்சற்ற இயற்கை சாயங்கள் மட்டுமே பயன்படுத்தப்பட வேண்டும் என வலியுறுத்தினார்.

மேலும், ஒருமுறை பயன்படுத்தப்படும் பிளாஸ்டிக் மற்றும் தெர்மாகோல் பொருட்கள் பயன்படுத்தத் தடைசெய்யப்பட்டுள்ளன. சிலைகளை அலங்கரிக்கும் பந்தல்களிலும் சுற்றுச்சூழலுக்கு உகந்த பொருட்களே பயன்படுத்தப்பட வேண்டும். விநாயகர் சிலைகள் கரைக்க மாவட்ட நிர்வாகம் குறிப்பிட்ட இடங்கள்: வாணியாறு அணை, வரட்டாறு அணை, ஈச்சம்பாடி அணை, கேசர்குளிஹல்லா அணை, தென்பெண்ணையாறு, ஒகேனக்கல் காவிரி ஆறு. விநாயகர் சதுர்த்தி விழாவை சுற்றுச்சூழலுக்கு உகந்த முறையில் கொண்டாட பொதுமக்கள் ஒத்துழைக்குமாறு மாவட்ட ஆட்சியர் கேட்டுக்கொண்டுள்ளார். மேலும் விவரங்களுக்கு மாவட்ட காவல் கண்காணிப்பாளர் மற்றும் மாவட்ட சுற்றுச்சூழல் பொறியாளர் ஆகியோரை தொடர்புகொள்ளலாம் எனவும் தெரிவித்தார்.