கைபேசி சாதனங்களை கையாளும் குழந்தைகள் – நலனும் பாதுகாப்பும்.

இன்றைய டிஜிட்டல் காலத்தில் கைபேசி, டேப்லெட் போன்ற ஸ்மார்ட் சாதனங்கள் குழந்தைகளின் வாழ்வில் ஒரு பகுதியாக மாறிவிட்டன. கல்விக்காக, பொழுதுபோக்கிற்காக என பெற்றோர்கள் இவற்றை குழந்தைகளிடம் கொடுக்கத் தொடங்கியுள்ளனர். ஆனால், இந்த சாதனங்களை முறையற்ற முறையில் பயன்படுத்துவது குழந்தைகளின் உடல் மற்றும் மன நலத்திற்கு பெரும் பாதிப்பை ஏற்படுத்தி வருகிறது.

புதிய தகவல்களை தெரிந்து கொள்ள, கற்றலில் ஆர்வத்தை வளர்த்துக்கொள்ள கைபேசி பயன்படக்கூடியதாக இருந்தாலும், அதற்கான கட்டுப்பாடுகள் இல்லாமல் இருப்பது ஆபத்தாக மாறுகிறது. நாளுக்கு நாள் குழந்தைகள் ஸ்கிரீனில் செலவிடும் நேரம் அதிகரித்து வருவதால், கண்கள் பாதிக்கப்படுகின்றன, தூக்கக்கேடு ஏற்படுகிறது. நெடுநேரம் ஒரு இடத்தில் அமர்ந்து இருப்பதால் உடல் இயக்கம் குறைகிறது, அது வளரும் உடற்கூறுகளுக்கு இடர்பாடாக இருக்கலாம்.

மனநலத்திலும் இது பெரிய தாக்கத்தை ஏற்படுத்துகிறது. அதிகமாக வீடியோக்கள் பார்க்கும், விளையாட்டுகள் விளையாடும் குழந்தைகள் எளிதில் ஒருநிலை திருப்தி அடைய முடியாமல் வேகமாக சலிப்படைகின்றனர். டிஜிட்டல் சாதனங்களுக்கு பழக்கப்பட்ட குழந்தைகள், நேரடி மனித உறவுகளில் ஈடுபட மறுப்பதும், தனிமை மற்றும் மன அழுத்தம் அடைவதும் அறியப்பட்ட செய்திகளே.

இன்டர்நெட்டில் கட்டற்ற தகவல்கள் கிடைப்பதால், வயதுக்கு ஏற்ப அல்லாத வீடியோக்கள், விளம்பரங்கள் மற்றும் சமூக ஊடகங்களை அணுகும் அபாயம் அதிகமாகியுள்ளது. சில நேரங்களில், குழந்தைகள் இணையத்தில் தவறான நண்பர்களின் தாக்கத்திற்கு உள்ளாகும் அபாயமும் உள்ளது. இவ்வாறு ஏற்படும் எதிர்மறை விளைவுகளை தவிர்க்க, பெற்றோர் குழந்தைகளின் கைபேசி பயன்பாட்டை கவனிக்க வேண்டும். தினசரி ஒரு குறிப்பிட்ட நேர அளவிற்கு மட்டுமே ஸ்கிரீன் டைம் வழங்க வேண்டும். மேலும், குழந்தைகளுடன் நேரம் கழித்து, வெளிப்புற விளையாட்டு, புத்தக வாசிப்பு, படிப்புத் தொடர்பான செயல்களில் ஈடுபட ஊக்குவிக்க வேண்டும்.

கைபேசி சாதனங்களை முறையாக கையாள்வது குழந்தைகளுக்கு தேவையான நவீன அறிவை வழங்கும் என்பதில் சந்தேகம் இல்லை. ஆனால் அதன் பயன்பாட்டை கட்டுப்படுத்துவது, அவர்களின் உடல், மன நலத்தையும், எதிர்காலத்தையும் பாதுகாக்கும் ஒரே வழியாகும். 

 - வினோத்குமார் ஆ - ஆசிரியர், 

தகடூர்குரல்.காம்

நீங்களும் எழுதலாம், உங்கள் கட்டுரைகளை 9843663662 என்கிற வாட்சப் எண்ணிற்கு அனுப்பவும்.