தருமபுரி மாவட்ட புதிய மாவட்ட ஆட்சியர் அலுவலகத்தை காணொளி காட்சி வாயிலாக முதலமைச்சர் திறந்து வைத்தார்.

தருமபுரி, ஜூலை 7 (ஆனி 23, சுபகிருது) –

தமிழ்நாடு முதலமைச்சர் மு.க. ஸ்டாலின் அவர்கள், தருமபுரி மாவட்டம் உள்ளிட்ட பல்வேறு மாவட்டங்களில் வருவாய்த் துறை சார்பாக கட்டப்பட்டுள்ள புதிய அரசு அலுவலக கட்டடங்களை இன்று தலைமைச் செயலகத்தில் இருந்து காணொளி காட்சி வாயிலாக திறந்து வைத்தார்.

தருமபுரி மாவட்ட ஆட்சியர் அலுவலக வளாகத்தில் ரூ.36.62 கோடி செலவில் கட்டப்பட்டுள்ள ஐந்துத் தளங்கள் கொண்ட கூடுதல் அலுவலக கட்டடம், விரிவான வசதிகளுடன் அமைக்கப்பட்டுள்ளது. இதில் மாவட்ட ஆட்சியரின் முக்கிய அலுவலகங்கள், கூட்டரங்கங்கள், வட்ட அலுவலர்கள், சமூக நலத்துறைகள், திட்ட மேலாண்மை, ஊரக வளர்ச்சி, தரை மற்றும் நில அளவை, சுரங்கத் துறை உள்ளிட்ட பல பிரிவுகள் உள்ளன. இது மாவட்ட நிர்வாகத்தின் செயல்திறனை மேம்படுத்தும் வகையில் திட்டமிட்டு கட்டப்பட்டுள்ளது.

மேலும், மதுரை, தருமபுரி, தூத்துக்குடி மற்றும் திண்டுக்கல் ஆகிய மாவட்டங்களில் ரூ.17.52 கோடி செலவில் கட்டப்பட்டுள்ள 4 வட்டாட்சியர் அலுவலக கட்டடங்கள், மற்றும் கன்னியாகுமரி மற்றும் கடலூர் மாவட்டங்களில் ரூ.65.76 லட்சம் மதிப்பில் கட்டப்பட்டுள்ள 2 வருவாய் ஆய்வாளர் அலுவலகத்துடன் கூடிய குடியிருப்புகளும் திறக்கப்பட்டன. மொத்தமாக ரூ.54.80 கோடி மதிப்பீட்டில் இந்த கட்டடங்கள் பொதுமக்கள் பயன்பாட்டிற்கு வந்துள்ளன.

வருவாய்த் துறை என்பது, மக்களின் அன்றாட தேவையான வருவாய், சாதி, இருப்பிடம் போன்ற சான்றிதழ்கள் வழங்குதல், பட்டா மாற்றம், மற்றும் பேரிடர் காலங்களில் மக்களை பாதுகாப்பது போன்ற பொறுப்புகளை மேற்கொள்கின்றது. இதனை மேலும் வலுப்படுத்தும் நோக்கில், கட்டடங்கள், குடியிருப்புகள் மற்றும் இணையவழி சேவைகள் விரிவாக்கம் செய்யப்படுகின்றன.

இந்த விழாவில் வருவாய் மற்றும் பேரிடர் மேலாண்மைத் துறை அமைச்சர் கே.கே.எஸ்.எஸ்.ஆர். இராமச்சந்திரன், தலைமைச் செயலாளர் நா. முருகானந்தம், வருவாய் நிர்வாக ஆணையர் மு. சாய் குமார், மற்றும் பல உயர் அதிகாரிகள் பங்கேற்றனர். தருமபுரி மாவட்டத்தில் நடைபெற்ற நிகழ்வில், வேளாண் துறை அமைச்சர் எம்.ஆர்.கே. பன்னீர்செல்வம், மக்களவை உறுப்பினர் அ.மணி, சட்டமன்ற உறுப்பினர் எஸ்.பி. வெங்கடேஸ்வரன், மாவட்ட ஆட்சியர் ரெ. சதீஷ் உள்ளிட்டோர் பங்கேற்றனர்.