பாலக்கோடு அருகே தேசிய நெடுஞ்சாலையில் லாரி கவிழ்ந்து விபத்து; ஓட்டுநர் காயம், போலீசார் விசாரணை.

பாலக்கோடு, ஜூலை 26 | ஆடி 09 -

தருமபுரி மாவட்டம், பாலக்கோடு அருகே உள்ள எர்ரனஅள்ளி பகுதியில், ஓசூர்-தருமபுரி அதிவிரைவு தேசிய நெடுஞ்சாலையில் ஒரு சரக்கு லாரி தலைகுப்புற கவிழ்ந்தது. இந்த லாரி, கர்நாடக மாநிலம் பெங்களூரிலிருந்து சிவகாசியில் உள்ள பட்டாசு தொழிற்சாலைகளுக்காக பேப்பர் ரோல்களை ஏற்றி கொண்டு சென்றது. அந்த லாரியை தருமபுரி மாவட்டம் புலிகரை பகுதியைச் சேர்ந்த அரவிந்த் (வயது 28) என்பவர் ஓட்டிச் சென்றார்.

முன்னெச்சரிக்கையின்றி, எர்ரனஅள்ளி அருகே வந்தபோது, லாரி திடீரென தடம்புரண்டு, சாலையோர மின்கம்பத்தில் மோதி தலைகுப்புற கவிழ்ந்தது. இவ்விபத்தில் லாரி ஓட்டுநர் லாரிக்கடியில் சிக்கிய நிலையில் இருந்ததையடுத்து, அருகிலிருந்தவர்கள் அவரை மீட்டனர். பின்னர், 108 ஆம்புலன்ஸ் மூலம் பாலக்கோடு அரசு மருத்துவமனைக்கு அனுப்பி வைத்தனர்.

விபத்து ஏற்படும் போது, லாரி சாலையின் ஓரமாக கவிழ்ந்ததால் போக்குவரத்துக்கு இடையூறு ஏற்படவில்லை. மின்கம்பத்தில் மோதியதால், அந்த பகுதியில் மின்சாரம் துண்டிக்கப்பட்டுள்ளது. லாரியை அப்புறப்படுத்த கிரைன் உதவியுடன் போலீசார் நடவடிக்கை மேற்கொண்டு வருகின்றனர். பாலக்கோடு போலீசார் சம்பவ இடத்திற்கு விரைந்து வந்து விபத்து குறித்து விசாரணை மேற்கொண்டு வருகின்றனர். விசாரணையின் தொடக்க கட்டத்திலேயே, ஓட்டுநர் தூக்க கலக்கத்தில் இருந்திருக்கலாம் என தெரிவித்துள்ளனர்.

இத்தகைய விபத்துகள் அந்தப்பகுதியில் மீண்டும் மீண்டும் ஏற்படுவதால், பொதுமக்களும் வாகன ஓட்டிகளும் பாதுகாப்பு நடவடிக்கைகளை வலியுறுத்தி வருகின்றனர். முக்கியமாக, இந்த நெடுஞ்சாலை முழுமையாக பணிகள் முடிவடையாத நிலையில் திறக்கப்பட்டிருப்பதும், எச்சரிக்கை சிக்னல்கள், அறிவிப்பு பலகைகள் இல்லாததும் கவலைக்கிடமானது எனவும் அவர்கள் கூறுகின்றனர். இந்த பகுதியில் பாதுகாப்பான சாலை பயணத்தை உறுதி செய்ய, தற்காலிக மற்றும் நிரந்தர நடவடிக்கைகள் மேற்கொள்ள வேண்டும் என்பதே மக்களின் வலியுறுத்தல் ஆகும்.