ஆதி பவுண்டேஷன் சார்பாக இண்டூர் பெரிய ஏரி தூர்வாரும் பணி மாவட்ட ஆட்சியர் தலைமையில் தொடக்கம்.

இண்டூர், மே 08:

தருமபுரி மாவட்டம், நல்லம்பள்ளி வட்டம், இண்டூர் கிராமத்தில் உள்ள பெரிய ஏரியில் தூர்வாரும் பணி இன்று (08.05.2025) தொடங்கியது. இந்த திட்டத்தை மாவட்ட ஆட்சித்தலைவர் திரு. ரெ. சதீஸ், இ.ஆ.ப., அவர்கள் கொடியசைத்து துவக்கி வைத்தார்.

இந்தப் பணிகள் குறித்து பேசிய மாவட்ட ஆட்சியர் கூறியதாவது:

தருமபுரி மாவட்டத்தில் உள்ள 10 ஊராட்சி ஒன்றியங்களில் மொத்தமாக 251 கிராம ஊராட்சிகள் உள்ளன. இவை உட்பட மாவட்டத்துக்கு சொந்தமான 546 ஏரிகள் காணப்படுகின்றன. இந்த ஏரிகளில் பெரும்பாலானவை சீமைக்கருவேல் மர வளர்ச்சியால் பாதிக்கப்பட்டுள்ளதுடன், உள்வரப்பும் வெளிச்செல்லும் கால்வாய்களும் சீரமைக்கப்படாத நிலையிலுள்ளன.

இந்த சூழ்நிலையில், கடந்த 10 நாட்களுக்கு முன்னர் மாவட்டத்திலுள்ள தன்னார்வலர்கள், தொழிலதிபர்கள், தொண்டு நிறுவனங்கள், ஒப்பந்ததாரர்கள் உள்ளிட்டவர்களுடன் ஆலோசனைக் கூட்டம் நடத்தப்பட்டது. இதில் 96 ஏரிகளில் சீமைக்கருவேல் மரங்களை அகற்றி, கால்வாய்கள் மற்றும் ஏரிக்கரைகளை சீரமைக்கும் திட்டங்கள் முடிவுசெய்யப்பட்டது.

இதற்கமைய, தற்போது பல்வேறு ஏரிகளில் தூர்வாரும் பணிகள் தீவிரமாக நடைபெற்று வருகின்றன. இதில் பாலக்கோடு ஊராட்சி ஒன்றியத்தில் உள்ள கடமடை ஏரியில் மரங்கள் அகற்றி, பனை விதைகள் நடும் பணியும் மேற்கொள்ளப்பட்டுள்ளது. அதுபோல, இண்டூர் பெரிய ஏரியில் தற்போது ஆதி பவுண்டேசன் எனும் தன்னார்வ தொண்டு நிறுவனம் தூர்வாரும் பணியை மேற்கொண்டு வருகிறது.

மாவட்டத்தில் உள்ள அனைத்து ஏரிகளையும் பொதுமக்கள் தங்களது சொத்தாக கருதி பாதுகாக்க வேண்டும். ஏரிகளில் பிளாஸ்டிக் கழிவுகள் மற்றும் குப்பைகள் கொட்டுவது தவிர்க்கப்பட வேண்டும். ஏரிகளின் தூர்வாரும் பணியை முறையாக முடித்து, வரவுள்ள பருவமழையை சேமித்து வைக்க நடவடிக்கை எடுக்கப்பட்டுள்ளதாகவும் ஆட்சியர் தெரிவித்தார்.

இந்நிகழ்ச்சியில், உதவி இயக்குநர் (ஊராட்சிகள்) திரு. நிர்மல் ரவிக்குமார், நல்லம்பள்ளி வட்டாட்சியர் திரு. சிவக்குமார், வட்டார வளர்ச்சி அலுவலர்கள் திரு. இளங்குமரன், திரு. நந்தகோபால் மற்றும் பலர் பங்கேற்றனர்.