பாலக்கோடு அருகே குடிநீர் சுத்திகரிப்பு நிலையம் பயன்பாட்டிற்கு வருமா? மக்கள் எதிர்பார்ப்பு அதிகரிப்பு.

பாலக்கோடு, ஏப்ரல் 6 –

தர்மபுரி மாவட்டம் பாலக்கோடு வட்டத்தைச் சேர்ந்த புலிக்கரை பஞ்சாயத்தில் அமைந்துள்ள புலிகரை கிராமத்தில், மூன்று ஆண்டுகளுக்கு முன்பு ரூ.8 இலட்சம் மதிப்பீட்டில் கட்டப்பட்ட குடிநீர் சுத்திகரிப்பு நிலையம் இதுவரை செயல்பாட்டுக்கு வராததால் பொதுமக்கள் கடும் விரக்தியில் உள்ளனர்.

கோடை காலம் தீவிரம் அடைந்துள்ள இந்நேரத்தில், கிராம மக்கள் தண்ணீருக்காக தவிக்கும் சூழ்நிலையில், மிக முக்கிய தேவையாக அமைந்துள்ள இந்த சுத்திகரிப்பு நிலையம் மூடப்பட்ட நிலையில் இருப்பது விமர்சனங்களை ஏற்படுத்தியுள்ளது. பக்கத்திலுள்ள கிராமங்களிலும் குடிநீர் பற்றாக்குறை அதிகரித்து வருவதால், இந்த சுத்திகரிப்பு நிலையம் திறக்கப்பட வேண்டும் என்ற மக்கள் கோரிக்கை எழுந்துள்ளது.

முழுமையாக கட்டி முடிக்கப்பட்ட நிலையம் தற்போது வெறும் காட்சி பொருளாகவே உள்ளது. இதில் உள்ள உபகரணங்கள் பேணிப் பாதுகாக்கப்படாமல் சேதமடையும் அபாயமும் இருப்பதால், அரசு மற்றும் ஊராட்சி நிர்வாகம் இந்த நிலையத்தை உடனடியாக திறந்து பொதுமக்களின் பயன்பாட்டிற்கு கொண்டு வர நடவடிக்கை எடுக்க வேண்டும் என கிராம மக்கள் வலியுறுத்தியுள்ளனர்.

"மூன்றாண்டுகளாக செயல்படாத நிலையில் இருக்கும் இந்த திட்டம், மக்கள் வரிப்பணத்தில் கட்டப்பட்டு பயன்பாட்டுக்கு வராமல் இருப்பது சோகம். மக்கள் தாகம் தீர இது அவசரமாக செயல்படுத்தப்பட வேண்டும்," என ஒரு பொதுமக்கள் பிரதிநிதி கூறினார். இது தொடர்பாக உள்ளாட்சி நிர்வாகம் விரைந்து நடவடிக்கை எடுத்து, கோடை வேளையில் பொதுமக்களுக்கு நீரிழிவு தீர்வு அளிக்க நடவடிக்கை எடுக்க வேண்டிய அவசியம் ஏற்பட்டுள்ளது.