வன உரிமைச் சட்டம் 2006 குறித்து மாவட்ட அளவிலான பயிற்சி வகுப்பு – மாவட்ட ஆட்சியர் தொடங்கி வைத்தார்.

தருமபுரி, 30 ஏப்ரல் 2025

தருமபுரி மாவட்ட ஆட்சியர் அலுவலக கூட்டரங்கில், ஆதிதிராவிடர் மற்றும் பழங்குடியினர் நலத்துறையின் சார்பில், வன உரிமைச் சட்டம் 2006–இன் நடைமுறை செயல்பாடுகளைத் தெளிவுபடுத்தும் மாவட்ட அளவிலான ஒருநாள் பயிற்சி வகுப்பு இன்று நடைபெற்றது. இப்பயிற்சியை மாவட்ட ஆட்சித்தலைவர் திரு. ரெ. சதீஸ், இ.ஆ.ப., அவர்கள் தலைமை ஏற்று தொடங்கி வைத்தார்.

மாண்புமிகு தமிழ்நாடு முதலமைச்சர் அவர்கள் வனப்பகுதிகளில் வசிக்கும் பழங்குடியினரின் வாழ்க்கைத்தர மேம்பாடு மற்றும் உரிமைகளை பாதுகாக்க பல்வேறு திட்டங்களை செயல்படுத்தி வருகிறார். அந்த அடிப்படையில், வன உரிமைச் சட்டத்தின் முக்கிய அம்சங்களை அறிவுறுத்தும் நோக்கில் இந்த பயிற்சி வகுப்பு ஏற்பாடு செய்யப்பட்டிருந்தது. இதில் வருவாய்த்துறை, வனத்துறை, மாவட்ட ஊரக வளர்ச்சி முகமை, ஆதிதிராவிடர் மற்றும் பழங்குடியினர் நலத்துறையின் அலுவலர்கள் கலந்துகொண்டனர்.

பழங்குடியினர் வசிக்கும் பகுதிகளில் கிராம சபை கூட்டங்களை நடத்தி, வன உரிமை சட்டத்தின் நடைமுறை செயல்பாடுகளை முன்னெடுக்க தேவையான ஆலோசனைகள் இப்பயிற்சியில் வழங்கப்பட்டன. மூன்று தலைமுறைகளாக வனப்பகுதிகளில் வசித்து வரும் பழங்குடியினர் மற்றும் பிற இனத்தவருக்கு தனிநபர் வன உரிமைப்பட்டா வழங்க தேவையான ஆவணங்கள், விண்ணப்ப செயல்முறை, நிலை ஆய்வுகள் மற்றும் விசாரணை நடவடிக்கைகள் குறித்தும் விளக்கங்கள் வழங்கப்பட்டன. கிராம நிர்வாக அலுவலர்கள் மற்றும் வருவாய் ஆய்வாளர்கள் தங்களுடைய நிலை ஆய்வுகளின் அடிப்படையில் தகுதியான விண்ணப்பங்களை கோட்ட அளவிலான குழுவிற்கு அனுப்ப வேண்டிய பொறுப்புகள் குறித்து விளக்கப்பட்டது.

வன உரிமைச் சட்டம் குறித்த தெளிவும், அதை நடைமுறைப்படுத்துவதற்கான துறைசார் ஒத்துழைப்பும் முக்கியத்துவம் பெறும் வகையில் இந்நிகழ்வு அமைந்தது. இது, பழங்குடியினர் உரிமைகளை சட்டபூர்வமாக உறுதி செய்யும் முயற்சிக்கு ஊக்கமாக விளங்கும் என்று தெரிவிக்கப்பட்டது.