பாலக்கோட்டில் தரமற்ற சாலைப் பணி என பொதுமக்கள் குற்றச்சாட்டு; அதிகாரிகள் ஆய்வு நடத்த கோரிக்கை.

பாலக்கோடு, ஜூலை 21:

தருமபுரி மாவட்டம் பாலக்கோட்டில், நெடுஞ்சாலைத் துறையின் கட்டுப்பாட்டில் உள்ள ஓசூர்–தருமபுரி மாநில நெடுஞ்சாலையில் நடைபெற்று வரும் தார்சாலை அமைக்கும் பணிகள் தரமற்ற முறையில் மேற்கொள்ளப்படுவதாக பொதுமக்கள் குற்றம்சாட்டியுள்ளனர். அப்பகுதி மக்களின் கூறுகையின்படி, கடந்த ஐந்து ஆண்டுகளாக இந்தச் சாலை சீரமைக்கப்படாமல் குண்டும் குழியுமாக இருந்ததால், தினமும் ஆயிரக்கணக்கான வாகன ஓட்டிகள் மற்றும் பொதுமக்கள் கடும் சிரமத்தையும் விபத்து அபாயத்தையும் சந்தித்து வந்தனர்.

நீண்டகால கோரிக்கைக்கு பின்னர் தற்போது தார்சாலை அமைக்கும் பணிகள் தொடங்கியுள்ள நிலையில், பணிகளை மேற்கொள்ளும் ஒப்பந்த நிறுவனம் நிர்ணயிக்கப்பட்ட தரநிலைகளைப் பின்பற்றாமல் செயல்படுவதாக பொதுமக்கள் புகார் தெரிவித்துள்ளனர். சாலை அமைக்கும் பணியில் தேவையான அளவு ஜல்லி மற்றும் தார் கலவை பயன்படுத்தப்படவில்லை என்றும், பணிகள் அவசரகதியில் மேற்கொள்ளப்படுவதால் சாலையின் நீடித்த தரம் பாதிக்கப்படக்கூடும் என்றும் அவர்கள் கவலை தெரிவித்துள்ளனர்.

மேலும், பணிகளின் தரத்தை கண்காணிக்க வேண்டிய நெடுஞ்சாலைத் துறை அதிகாரிகள் யாரும் நேரில் வந்து ஆய்வு மேற்கொள்ளவில்லை என்றும், அதிகாரிகளின் மேற்பார்வை இல்லாததால் ஒப்பந்ததாரர் தனது விருப்பப்படி பணிகளை மேற்கொண்டு வருவதாகவும் பொதுமக்கள் குற்றம்சாட்டியுள்ளனர். இதுகுறித்து தருமபுரி மாவட்ட ஆட்சியரும், நெடுஞ்சாலைத் துறையின் உயர் அதிகாரிகளும் நேரில் ஆய்வு நடத்தி, சாலைப் பணிகள் நிர்ணயிக்கப்பட்ட தரநிலைகளின்படி நடைபெறுவதை உறுதி செய்யவும், தேவையான நடவடிக்கைகளை மேற்கொள்ளவும் பொதுமக்கள் கோரிக்கை விடுத்துள்ளனர்.