தருமபுரி, டிச.15:
தருமபுரி மாவட்டத்தில் சமீப காலமாக புற்றிசல் போல துணை மருத்துவ (Paramedical / Nursing Assistant) கல்வி நிறுவனங்கள் துவங்கப்படுவது, மாணவர்கள் மற்றும் பெற்றோர்களிடையே கடும் கவலையை ஏற்படுத்தியுள்ளது. அரசு அங்கீகாரம் இருப்பது போல விளம்பரம் செய்து, குறுகிய காலத்தில் வேலைவாய்ப்பு கிடைக்கும் என ஆசை காட்டி, இளம் தலைமுறையை இந்நிறுவனங்கள் தவறாக வழிநடத்தி வருகின்றன என்ற குற்றச்சாட்டு பரவலாக எழுந்துள்ளது.
10ம் வகுப்பு தேர்ச்சி அல்லது தோல்வி என்பதே அடிப்படை தகுதி எனக் காட்டி, எந்த விதமான அரசு அனுமதி, கல்வித் தர நிர்ணயம், நுழைவுத் தேர்வு இல்லாமலே சேர்க்கை நடத்தும் நிறுவனங்கள் தருமபுரி மாவட்டத்தில் அதிகரித்து வருவதாக கூறப்படுகிறது. “Nursing Assistant”, “Paramedical”, “Lab Technician”, “First Aider” போன்ற பெயர்களில் படிப்புகள் நடத்தப்பட்டு, அவை அரசு அல்லது கவுன்சில் அங்கீகாரம் பெற்றவை என மாணவர்களுக்கு தவறான நம்பிக்கை ஏற்படுத்தப்படுகிறது.
கவலைக்கிடமான விஷயம் என்னவெனில், தருமபுரி மாவட்டத்தில் உள்ள சில தனியார் மருத்துவமனைகளில், இத்தகைய அங்கீகாரமற்ற கல்வி நிறுவனங்களில் பயிற்சி பெற்ற மாணவர்கள் உயிர்காக்கும் பணிகளில் பணியமர்த்தப்பட்டு வருவது குறித்து தகவல்கள் வெளியாகியுள்ளன. அவசர சிகிச்சை, முதலுதவி, நோயாளி பராமரிப்பு போன்ற பணிகளில் முறையான தகுதி இல்லாத நபர்கள் செயல்படுவது, மக்களின் உயிரோடு விளையாடும் மிக மோசமான மற்றும் விபரீத செயல் என சமூக ஆர்வலர்கள் தெரிவிக்கின்றனர்.
இந்நிலையில், இந்த கல்வி நிறுவனங்களில் பயிலும் மாணவர்களுக்கு எந்த மத்திய அல்லது மாநில அரசின் கல்லூரி அல்லது சட்டபூர்வ அமைப்புகளின் பாடத்திட்டங்கள் கற்பிக்கப்படுகின்றன? என்ற மிக முக்கியமான கேள்வியும் தருமபுரி மாவட்டத்தில் எழுந்துள்ளது. அரசு அங்கீகாரம் பெற்ற நர்சிங் மற்றும் துணை மருத்துவக் கல்வி நிறுவனங்களில் பாடத்திட்டங்கள் சம்பந்தப்பட்ட சட்டபூர்வ கவுன்சில்களால் நிர்ணயிக்கப்படுகின்றன. ஆனால் அங்கீகாரம் இல்லாத நிறுவனங்களில் யார் பாடத்திட்டத்தை தயாரிக்கிறார்கள், எந்த தரநிலையை பின்பற்றுகிறார்கள், அந்த பாடத்திட்டங்களுக்கு அரசு ஒப்புதல் உள்ளதா? என்பதில் எந்தத் தெளிவும் இல்லை என்பதே பெற்றோர்களின் கவலையாக உள்ளது.
உண்மை நிலை என்னவெனில், முறையான அரசு அங்கீகாரம் இன்றி நடத்தப்படும் இந்த துணை மருத்துவ மற்றும் நர்சிங் சார்ந்த படிப்புகள் சட்டப்படி செல்லுபடியாகாதவை. இதுபோன்ற கல்வி நிறுவனங்கள் கடந்த மூன்று ஆண்டுகளில் தருமபுரி மாவட்டத்தில் கணிசமான அளவில் அதிகரித்துள்ளன என்பதும் குறிப்பிடத்தக்கது. கட்டுப்பாடற்ற வளர்ச்சியும், போதிய கண்காணிப்பு இல்லாததுமே இன்றைய ஆபத்தான நிலைக்கு காரணம் என கூறப்படுகிறது.
இந்த நிறுவனங்களில் பயிற்சி முடித்த மாணவர்கள், பின்னர் அரசு அல்லது அங்கீகாரம் பெற்ற மருத்துவமனைகளில் வேலை தேடும் போது, அவர்களின் சான்றிதழ்கள் ஏற்றுக்கொள்ளப்படாததால், மாணவர்களின் எதிர்காலமே கேள்விக்குறியாகிறது. பல பெற்றோர் கடன் வாங்கியும் சேமித்த பணத்தையும் செலவழித்து குழந்தைகளை சேர்க்கும் நிலையில், பின்னர் அந்த சான்றிதழ்கள் பயனற்றதாக மாறுவது சமூக ரீதியாக பெரும் பாதிப்பை ஏற்படுத்துகிறது.
இது தனிநபர் பிரச்சினை அல்ல; தருமபுரி மாவட்டத்தின் பொது சுகாதாரம் மற்றும் மக்களின் உயிர் பாதுகாப்பை நேரடியாக பாதிக்கும் தீவிர பொதுநல விவகாரம். அங்கீகாரமற்ற கல்வி நிறுவனங்களையும், அவற்றில் பயிற்சி பெற்றவர்களை பணியமர்த்தும் மருத்துவமனைகளையும் ஒருசேர கண்காணித்து நடவடிக்கை எடுக்க வேண்டிய அவசியம் ஏற்பட்டுள்ளதாக சமூக ஆர்வலர்கள் வலியுறுத்துகின்றனர்.
இந்த சூழலில், தருமபுரி மாவட்ட ஆட்சியர், சுகாதாரத் துறை மற்றும் மருத்துவக் கல்வித் துறை அதிகாரிகள் உடனடியாக தலையிட்டு, அங்கீகாரம் இன்றி இயங்கும் துணை மருத்துவ கல்வி நிறுவனங்கள் மீது ஆய்வு நடத்தி, விதிமீறல்கள் கண்டறியப்பட்டால் கடும் நடவடிக்கை எடுக்க வேண்டும் என்ற கோரிக்கை வலுத்துள்ளது. அதேபோல், பொதுமக்கள், மாணவர்கள் மற்றும் பெற்றோர்களுக்கு அரசு சார்பில் தெளிவான விழிப்புணர்வு அறிவிப்புகள் வெளியிடப்பட வேண்டும் என்பதும் மாவட்ட மக்களின் எதிர்பார்ப்பாக உள்ளது.
புற்றிசல் போல உருவாகும் இத்தகைய கல்வி நிறுவனங்களையும், அவற்றின் பாடத்திட்டங்களின் நம்பகத்தன்மையையும் உடனடியாக கட்டுப்படுத்த தவறினால், தருமபுரி மாவட்டத்தில் ஒரு தலைமுறையின் கல்வியும், மக்களின் உயிர் பாதுகாப்பும் பெரும் ஆபத்தில் சிக்கி விடும் என்பதே சமூகத்தின் கடும் எச்சரிக்கையாக உள்ளது.
🔎 Fact Check – உரிய ஆதாரங்கள் (Government & Statutory Sources)
-
Tamil Nadu Nurses and Midwives Council – Official Caution & E-Recognition
-
Indian Nursing Council – Statutory Authority for Nursing & ANM Education
-
National Commission for Allied and Healthcare Professions Act, 2021(Paramedical / Allied Health courses regulation)
-
Ministry of Health & Family Welfare – Government of India
-
Legislative Department, Government of India – Societies Registration Act(SR Act registration ≠ government recognition)
.jpg)
.jpg)
.jpg)
