குடிநீர் வசதி கோரி கே.குள்ளாதிரம்பட்டியில் சாலை மறியல் – பள்ளி, கல்லூரி மாணவர்கள் தவிப்பு.

பென்னாகரம், நவ. 28 :

தருமபுரி மாவட்டம் பென்னாகரம் வட்டம் கே. குள்ளாதிரம்பட்டி பகுதியில், கடந்த இரண்டு மாதங்களாக நீடித்து வரும் கடும் குடிநீர் பிரச்சினையை எதிர்த்து, நூற்றுக்கும் மேற்பட்ட கிராம மக்கள் இன்று காலை சாலை மறியல் செய்ததால் பகுதி முழுவதும் பரபரப்பு ஏற்பட்டது. சாலை மறியல் காரணமாக காலை காரணமாக அந்த வழியில் செல்லும் பள்ளி மற்றும் கல்லூரி மாணவர்கள் செல்ல முடியாமல் தவிப்பு, அரசு மற்றும் தனியார் பேருந்துகள், கல்லுரி பேருந்துகள், பொதுமக்கள் பயணம் செய்த வாகனங்கள் எல்லாம் நிறுத்தப்பட்டன.

இதனால் சாலையின் இருபுறமும் 2 கிலோ மீட்டர் நீளத்திற்கு மேல் வாகனங்கள் வரிசையாக நின்று பெரும் நெரிசல் ஏற்பட்டது. போக்குவரத்து ஒரு மணி நேரத்திற்கும் மேலாக முடங்கியது. தகவல் அறிந்து சம்பவ இடத்திற்கு வந்த பென்னாகரம் வட்டாட்சியர் சண்முகசுந்தரம், ஒகேனக்கல் காவல் ஆய்வாளர் முரளி ஆகியோர் கிராம மக்களுடன் பேச்சுவார்த்தை நடத்தி சமரசம் செய்தனர். பின்னர் சாலை மறியல் அகற்றப்பட்டு போக்குவரத்து சீரடைந்தது. இந்த சம்பவம் அந்தப் பகுதியில் ஒரு மணி நேரத்திற்கும் மேலாக பரபரப்பை ஏற்படுத்தியது.

© தகடூர்குரல்.காம் | செய்தி மற்றும் விளம்பர தொடர்புக்கு : 9843 663 662