மனைவியை வெட்டிக் கொல்ல முயன்ற கணவருக்கு 7 ஆண்டு சிறை – தருமபுரி மகளிர் விரைவு நீதிமன்றம் தீர்ப்பு.

தகடூர்குரல் நவம்பர் 28, 2025 0

தருமபுரி – நவம்பர் 27:

தருமபுரி மாவட்டம் நல்லம்பள்ளி வட்டம் எள்ளுகுழி கிராமத்தைச் சேர்ந்த பெருமாள் (42) என்பவருக்கு, தனது மனைவியை வெட்டிக் கொல்ல முயன்ற குற்றத்திற்காக 7 ஆண்டு சிறை தண்டனையும் ரூ.50,000 அபராதமும் விதித்து தருமபுரி மகளிர் விரைவு நீதிமன்றம் தீர்ப்பளித்துள்ளது. விவசாயியான பெருமாள் தனது மனைவி மணிமேகலை (37) மற்றும் குழந்தைகளுடன் வசித்து வந்தார். குடும்பத்தகராறு காரணமாக மணிமேகலை தனது பெற்றோர் வீட்டிற்குச் சென்ற நிலையில், 2022 ஆகஸ்ட் 14 அன்று பெருமாள் அவளைச் சந்தித்து மீண்டும் குடும்ப வாழ்க்கைக்கு வருமாறு அழைத்ததாக கூறப்படுகிறது.

மணிமேகலை வர மறுத்ததால், ஏற்பட்ட வாக்குவாதத்தின் போது ஆத்திரமடைந்த பெருமாள் அரிவாளால் மணிமேகலையை தாக்கி வெட்டியுள்ளார். கடுமையாக காயமடைந்த மணிமேகலை மருத்துவமனையில் சேர்க்கப்பட்டு சிகிச்சைக்கு பின் குணமடைந்தார். மருத்துவமனையில் இருந்தபோது மணிமேகலை அளித்த வாக்குமூலத்தின் அடிப்படையில், தொப்பூர் காவல் நிலைய போலீசார் கொலை முயற்சி வழக்குப்பதிவு செய்து பெருமாளை கைது செய்தனர். வழக்கின் புலனாய்வு முடிந்ததும், மாவட்ட மகளிர் விரைவு நீதிமன்றத்தில் குற்றப்பத்திரிகை தாக்கல் செய்யப்பட்டது.

வழக்கை விசாரித்த மகளிர் விரைவு நீதிமன்ற நீதிபதி திருமதி ஹசினாபானு, M.L., அவர்கள் (26.11.2025) அன்று பெருமாளை குற்றவாளியாக அறிவித்து 7 ஆண்டு கடுங்காவல் சிறை மற்றும் ரூ.50,000 அபராதம் விதித்து தீர்ப்பளித்தார்.