தருமபுரியில் பெண்களுக்கு எதிரான வன்முறை ஒழிப்பு தினம்: பாலின சமத்துவ பேரணி; ஆட்சியர் துவக்கிவைத்தார்.

தகடூர்குரல் நவம்பர் 25, 2025 0

தருமபுரி, நவ. 25:

தருமபுரி பழைய மாவட்ட ஆட்சியர் அலுவலக வளாகத்தில் மகளிர் திட்டம் சார்பில் பெண்களுக்கு எதிரான வன்முறை ஒழிப்பு சர்வதேச தினம் மற்றும் பாலின சமத்துவ விழிப்புணர்வு பேரணி இன்று (25.11.2025) நடைபெற்றது. மாவட்ட ஆட்சித்தலைவர் ரெ. சதீஸ், இஆப., தருமபுரி நாடாளுமன்ற உறுப்பினர் ஆ. மணி ஆகியோர் முன்னிலையில் கொடியசைத்து விழிப்புணர்வு பேரணியை துவக்கி வைத்தனர். பின்னர், இருவரும் பாலின சமத்துவ உறுதிமொழியையும் ஏற்றுக்கொண்டனர்.

ஒவ்வொரு ஆண்டும் நவம்பர் 25ஆம் தேதி பெண்களுக்கு எதிரான வன்முறைகள் ஒழிப்பு தினம் உலகளவில் கடைப்பிடிக்கப்படுகிறது. இதனை முன்னிட்டு, இன்றிலிருந்து டிசம்பர் 23ஆம் தேதி வரை பெண்களுக்கு எதிரான பாலியல் வன்கொடுமைகள் மற்றும் பாலின சமத்துவம் குறித்த பல்வேறு விழிப்புணர்வு நிகழ்ச்சிகள் நடத்தப்பட உள்ளன.

உறுதிமொழியில்,

ஆண், பெண் குழந்தைகளைக் காக்கும் சமமான வளர்ப்பு,
வீட்டுப் பணிகளை சமமாக பகிர்ந்து செயல்,
பெண்களின் உயர் கல்வியை ஊக்குவித்தல்,
அனைத்து துறைகளிலும் பெண்களின் சம பங்கேற்பை உறுதி செய்தல்,
சொத்து உரிமையில் பெண்களை ஊக்குவித்தல்,
பெண்களுக்கு முடிவெடுக்கும் அதிகாரத்தை உறுதி செய்தல்,
பெண்கள் மீது நடைபெறும் உடல், மன, பொருளாதார துன்புறுத்தல்களைத் தடுக்கல்,
பெண் குழந்தைகள் பிறப்பு விகிதத்தை பாதுகாப்பது,
கருவில் பாலின பரிசோதனையைத் தவிர்ப்பது
போன்ற முக்கிய அம்சங்கள் வாசிக்கப்பட்டு உறுதிமொழி ஏற்றுக்கொள்ளப்பட்டது.

சுமார் 200க்கும் மேற்பட்ட மகளிர் சுய உதவி குழு உறுப்பினர்கள் கலந்து கொண்ட இந்த பேரணி, மாவட்ட ஆட்சியர் அலுவலக வளாகத்தில் தொடங்கி, இலக்கியம்பட்டி வழியாக பாரதிபுரம் சென்று நிறைவடைந்தது.

இந்நிகழ்ச்சியில் மகளிர் திட்ட இயக்குநர் அ. லலிதா, மாவட்ட முதன்மை கல்வி அலுவலர் ஐ. ஜோதி சந்திரா, இணை இயக்குநர் – மருத்துவம் மற்றும் ஊரக நலப்பணிகள் சாந்தி, உதவி மகளிர் திட்ட அலுவலர் சந்தோஷம், மகளிர் சுய உதவி குழு உறுப்பினர்கள் மற்றும் பல துறை அலுவலர்கள் கலந்து கொண்டனர்.