கர்த்தாரஅள்ளி சுங்கச்சாவடியில் எடைமேடை பயன்படுத்தப்படாததால் வருவாய் இழப்பு.

பாலக்கோடு, 11 செப்டம்பர் 2025 (ஆவணி 26) -

தருமபுரி மாவட்டம் அதியமான்கோட்டை முதல் கர்நாடகா மாநிலம் நெரலூர் வரை புதிய தேசிய நெடுஞ்சாலை அமைக்கப்பட்டு, கடந்த ஏப்ரல் மாதம் பொதுமக்கள் பயன்பாட்டிற்கு திறக்கப்பட்டது. இந்நெடுஞ்சாலையில் பாலக்கோடு அருகே கர்த்தாரஅள்ளியில் சுங்கச்சாவடி செயல்படுகிறது. இங்கு 4 சக்கர வாகனங்களுக்கு ரூ.85 சுங்கக் கட்டணம் வசூலிக்கப்படுகின்றது. உள்ளூர் மக்களுக்கு மாதாந்திர சலுகை ரூ.340 ஆக நிர்ணயிக்கப்பட்டுள்ளது.

இந்த சுங்கச்சாவடியில், அதிகபரிமாண சரக்குகள் ஏற்றி வரும் கனரக வாகனங்களை கண்காணிக்க எடைமேடை நிறுவப்பட்டுள்ளது. அனுமதிக்கப்பட்ட அளவை விட அதிக எடையில் சரக்கு ஏற்றும் வாகனங்களை கண்டறிந்து அபராதம் விதிப்பதற்காக இம்மேடை அமைக்கப்பட்டிருந்தது. ஆனால் இதுவரை அது பயன்பாட்டில் அமல்படுத்தப்படவில்லை.

இதன் காரணமாக அரசுக்கு கணிசமான வருவாய் இழப்பு ஏற்படுகிறது. மேலும், போக்குவரத்து அதிகாரிகள் கூடுதல் பாரம் ஏற்றி செல்லும் வாகனங்களை கண்காணிக்காமல் புறக்கணித்து வருகின்றனர் என்ற குற்றச்சாட்டு எழுந்துள்ளது. அதிக பாரத்தில் இயங்கும் லாரிகள் சாலையில் பழுதடைந்து நின்று போவதால், மற்ற வாகனங்கள் செல்லும் போது விபத்துகள் நிகழும் அபாயமும் அதிகரித்து வருகிறது.

இதனை முன்னிட்டு, மாவட்ட நிர்வாகம் அவசர நடவடிக்கை எடுத்து சுங்கச்சாவடியில் உள்ள எடைமேடையை உடனடியாக பயன்பாட்டிற்கு கொண்டு வர வேண்டும். அதேசமயம், போக்குவரத்து அதிகாரிகள் சாலைமூலம் செல்லும் கனரக வாகனங்களை துரிதமாக ஆய்வு செய்து சட்ட நடவடிக்கை எடுக்க வேண்டும் என பொதுமக்கள் வலியுறுத்தியுள்ளனர்.