தருமபுரியில் தற்காலிக பட்டாசு கடைக்கான விண்ணப்பம் – அக்டோபர் 10க்குள் சமர்ப்பிக்க வேண்டும்.

தருமபுரி, செப்டம்பர் 15 (ஆவணி 30):

வரும் அக்டோபர் 20, 2025 (தீபாவளி பண்டிகை நாள்) முன்னிட்டு, தருமபுரி மாவட்டத்தில் தற்காலிக பட்டாசு கடைகள் அமைக்க விரும்புவோர், வெடிபொருள் சட்டம் 1884 மற்றும் விதிகள் 2008-இன் படி உரிமம் பெற அக்டோபர் 10, 2025-க்குள் விண்ணப்பிக்க வேண்டும்.

விண்ணப்பங்களை https://www.tnesevai.tn.gov.in இணையதளம் மூலமாகவோ அல்லது அருகிலுள்ள இ-சேவை மையங்கள் வாயிலாகவோ மட்டுமே சமர்ப்பிக்கலாம். கடைசி நாளுக்குப் பின் அல்லது இணையவழி அல்லாமல் அனுப்பப்படும் விண்ணப்பங்கள் ஏற்கப்படமாட்டாது என அறிவிக்கப்பட்டுள்ளது.

விண்ணப்பத்துடன் இணைக்க வேண்டிய ஆவணங்கள்

1. விண்ணப்பதாரர் புகைப்படம்

2. முகவரிச் சான்று

3. புகைப்படத்துடன் கூடிய ஆதார் / பான் கார்டு / வாக்காளர் அட்டை

4. பட்டா அல்லது சொத்து பத்திரம்

5. வாடகை கட்டடமாக இருந்தால் நோட்டரி சான்றுடன் கூடிய வாடகை ஒப்பந்தம்

6. தற்காலிக உரிமக் கட்டணமாக ரூ.600 (இணையவழி விண்ணப்பத்திற்கு ரூ.500) செலுத்தி பெற்ற சலான்

7. உள்ளாட்சி அமைப்பிற்கு கட்டணம் செலுத்திய இரசீது

8. கட்டடத்தின் அங்கீகரிக்கப்பட்ட நீல வரைபடம்

கடைக்கான முக்கிய விதிமுறைகள்

• கடை கல் அல்லது தார்சு கட்டடமாக, தரைதளத்தில் (Ground floor only), ஒற்றைத் தளமாக (Single story) இருக்க வேண்டும்.

• பரப்பளவு குறைந்தது 9 ச.மீ. – அதிகபட்சம் 25 ச.மீ. இருக்க வேண்டும்.

• கதவுகள் வெளிப்புறமாக திறக்கும் வகையில் இருக்க வேண்டும்; இருபுறமும் வழி அமைந்திருக்கும்.

• வேறு பொருட்கள் கடையில் வைக்கக்கூடாது.

• மின்சார விளக்குகள் மட்டும் பயன்படுத்தப்பட வேண்டும்; அனைத்து மின் இணைப்புகளும் பாதுகாப்பாக மூடப்பட்டிருக்க வேண்டும்.

• எளிதில் தீப்பற்றக்கூடிய பொருட்கள் வைக்கக் கூடாது.

• செயல்திறன் உள்ள தீ தடுப்பு சாதனங்கள் கட்டாயம் வைக்கப்பட வேண்டும்.

• அனுமதிக்கப்பட்ட அளவுக்கு மீறி பட்டாசுகள் வைத்தால் பறிமுதல் செய்யப்படும்.

• தீயணைப்பு, சுகாதாரம் மற்றும் காவல்துறையிடமிருந்து தடையின்மைச் சான்று பெற்றிருக்க வேண்டும்.

மாவட்ட ஆட்சித்தலைவர் திரு. ரெ. சதீஸ், இ.ஆ.ப., அவர்கள், மேற்கண்ட விதிமுறைகள் அனைத்தையும் கடைபிடித்து மட்டுமே தற்காலிக பட்டாசு கடை அமைக்க அனுமதி வழங்கப்படும் என தெரிவித்துள்ளார்.