பாலக்கோடு அருகே 15 வயது சிறுமியை கர்ப்பமாக்கிய கூலி தொழிலாளி – போக்சோ சட்டத்தில் கைது.

பாலக்கோடு, ஆகஸ்ட் 12 | ஆடி 27 —

பாலக்கோடு அருகே, 15 வயது சிறுமியை ஏமாற்றி பாலியல் வன்முறைக்கு உட்படுத்தி கர்ப்பமாக்கிய கூலி தொழிலாளி, பாலியல் குற்றங்களிலிருந்து குழந்தைகளை பாதுகாக்கும் சட்டம் (POCSO) கீழ் கைது செய்யப்பட்டார். தகவல் தெரிவிக்கின்றது: தர்மபுரி மாவட்டம் பாலக்கோடு அருகிலுள்ள கிராமத்தைச் சேர்ந்த 15 வயது சிறுமி, பத்தாம் வகுப்பு படிப்பை நிறுத்தியிருந்தார். கடந்த சில மாதங்களுக்கு முன், இராயக்கோட்டை அருகே நடைபெற்ற கோயில் திருவிழாவில், அதே பகுதியைச் சேர்ந்த கூலி தொழிலாளி சதீஷ் (28) என்பவருடன் பழக்கம் ஏற்பட்டது.

பின்னர், கடந்த ஜூன் மாதத்தில், திருமண வாக்குறுதி அளித்து சிறுமியை தனியாக அழைத்து சென்று பாலியல் வன்முறை செய்ததாக கூறப்படுகிறது. சமீபத்தில் உடல்நல குறைபாடு ஏற்பட்டதால், சிறுமியை பெற்றோர் அரசு மருத்துவமனைக்கு அழைத்துச் சென்றனர். பரிசோதனையில், சிறுமி கர்ப்பமாக இருப்பது மற்றும் உடல் பலவீனம் ஏற்பட்டிருப்பது தெரியவந்தது.

மருத்துவர்கள், இந்த விவரத்தை குழந்தைகள் நல பாதுகாப்பு அலுவலருக்கு தெரிவித்தனர். அதன் பேரில், குழந்தைகள் நலத்துறை அதிகாரிகள் பாலக்கோடு அனைத்து மகளிர் காவல் நிலையத்தில் புகார் அளித்தனர். போலீசார், குற்றவாளி சதீஷை POCSO சட்டத்தின் கீழ் கைது செய்து, தர்மபுரி சிறையில் அடைத்தனர்.