பாதுகாப்பற்ற நிலையில் உள்ள ஆழ்துளைக் கிணறுகள் குறித்து அதிகாரிகள் எச்சரிக்கை.

தருமபுரி, மே 14:

தருமபுரி மாவட்டத்தில் உள்ள 10 ஊராட்சி ஒன்றியங்களுக்கு உட்பட்ட 251 கிராம ஊராட்சிகளில், மொத்தம் 2835 குக்கிராமங்கள் உள்ளன. இவற்றில் அரசும், தனிநபர்/நிறுவனங்களும் பயன்படுத்தும் வகையில் அமைக்கப்பட்டுள்ள 2726 ஆழ்துளை கிணறுகள் உள்ளன.

இவற்றில், தற்போது பயன்பாட்டில் இல்லாத பாதுகாப்பற்ற நிலையில் உள்ள 235 ஆழ்துளை கிணறுகள் (Abandoned Borewells) இருப்பதாக வட்டார வளர்ச்சி அலுவலர் மூலம் அறிக்கை பெறப்பட்டுள்ளது. மாவட்டத்தில் குடிநீர் பிரச்சினை உருவாகாமல் தடுக்கும் நோக்கில் மாவட்ட ஆட்சித் தலைவர் திரு ரெ. சதீஸ், இ.ஆ.ப., அவர்கள் தலைமையில் பல்வேறு ஆய்வுக்கூட்டங்கள் நடைபெற்றுள்ளன. இந்தக் கூட்டங்களில்:

• அனைத்து வட்டார வளர்ச்சி அலுவலர்கள், செயல் அலுவலர்கள் மற்றும் நகராட்சி ஆணையாளர்களுக்கு தேவையான நடவடிக்கைகள் மேற்கொள்ள உத்தரவிடப்பட்டுள்ளன.

• பயன்பாடற்ற, பாதுகாப்பற்ற நிலையில் உள்ள ஆழ்துளை கிணறுகள் அனைத்தும் கான்கிரீட் அல்லது உலோக மூடியால் மூடப்பட வேண்டும் (CAP - Closed And Protected).

• மூடப்படாத கிணறுகள் எதிர்பாராத விபத்துகளுக்கு காரணமாக இருக்கக்கூடியதால், பொதுமக்களுக்கு விழிப்புணர்வும் ஏற்படுத்தப்பட வேண்டும் என அறிவுறுத்தப்பட்டுள்ளது.

மேலும்:

• கள ஆய்வின்போது விதிமுறை மீறி கிணறுகளை திறந்த நிலையில் விட்டு உள்ளவர்கள் மீது முதல் தகவல் அறிக்கை (FIR) பதிவு செய்யப்பட வேண்டும்.

• தண்டனைக்குரிய நடவடிக்கைகள் மேற்கொள்ள வேண்டும் என அனைத்து வட்டார வளர்ச்சி அலுவலர்களுக்கும் உத்தரவு வழங்கப்பட்டுள்ளது.

மாவட்ட மக்கள்:

• குடிநீரைப் பொறுப்புடன் மற்றும் சிக்கனமாக பயன்படுத்த வேண்டும்.

• எந்தவொரு கிராம ஊராட்சியிலும் திறந்த நிலையில் இருக்கும் ஆழ்துளை கிணறுகளை கண்டால், தயவுசெய்து மாவட்ட நிர்வாகத்திடம் கட்டணமில்லா எண்ணான 1077-ஐ அழைத்து உடனடியாக தகவல் தெரிவிக்க வேண்டும்.

மாவட்ட மக்களின் பாதுகாப்பும், குடிநீர் வளங்களின் சீரான மேலாண்மையும் உறுதி செய்யும் வகையில் இந்நடவடிக்கைகள் மேற்கொள்ளப்படுவதாக மாவட்ட ஆட்சித் தலைவர் தெரிவித்துள்ளார்.