மாவட்ட ஆட்சியரின் விருப்ப நிதியிலிருந்து 5 மாற்றுத்திறனாளிகளுக்கு தமிழ்நாடு நகர்ப்புர வாழ்விட மேம்பாட்டு வாரியத்தால் அடுக்குமாடி குடியிருப்புக்கு பங்களிப்பு தொகையை செலுத்தினார்.

மாவட்ட ஆட்சியரின் விருப்ப நிதியிலிருந்து தருமபுரி மாவட்டத்தை சேர்ந்த 5 மாற்றுத்திறனாளிகளுக்கு தமிழ்நாடு நகர்ப்புர வாழ்விட மேம்பாட்டு வாரியத்தால் அடுக்குமாடி குடியிருப்பில் வீடு ஒதுக்கீடு செய்ய செலுத்த வேண்டிய பங்களிப்புத் தொகையான ரூ.5.73 இலட்சத்தை நிதியுதவியாக ஒதுக்கி, அடுக்குமாடி குடியிருப்புக்கான பணி ஆணையினை மாவட்ட ஆட்சித்தலைவர் திருமதி.கி.சாந்தி இஆப., அவர்கள் இன்று வழங்கினார்கள்.

தருமபுரி மாவட்ட ஆட்சியர் அலுவலக கூடுதல் கூட்டரங்கில் மக்கள் குறைதீர்க்கும் நாள் கூட்டம் மாவட்ட ஆட்சித்தலைவர் திருமதி.கி.சாந்தி, இஆப., அவர்கள் தலைமையில் இன்று (08.01.2024) நடைபெற்றது. இம்மக்கள் குறைதீர்க்கும் நாள் கூட்டத்தில் பொதுமக்களிடமிருந்து கோரிக்கை மனுக்களை பெற்றுகொண்டு, மாவட்ட ஆட்சித்தலைவர் அவர்கள் தெரிவித்ததாவது: மாண்புமிகு தமிழ்நாடு முதலமைச்சர் அவர்கள் பொதுமக்களின் கோரிக்கை மனுக்களுக்கு அதீத முக்கியத்துவம் அளித்து, விரைந்து நடவடிக்கை மேற்கொள்ள வேண்டுமென அறிவுறுத்தியுள்ளார்கள். 

அந்த வகையில் ஒவ்வொரு வாரம் திங்கட்கிழமைகளில் மாவட்ட ஆட்சியர் அலுவலகத்தில் நடைபெறும் மக்கள் குறைதீர்க்கும் நாள் கூட்டத்தில் பொதுமக்களிடமிருந்து பல்வேறு கோரிக்கை மனுக்களை பெறப்பட்டு, தொடர்புடைய துறை அலுவலர்களுக்கு அனுப்பி வைக்கப்பட்டு உரிய தீர்வுகள் காணப்பட்டு வருகிறது.

இன்றைய தினம் நடைபெற்ற மக்கள் குறை தீர்க்கும் நாள் கூட்டத்தில் பொதுமக்கள் சாலை வசதி, குடிநீர் வசதி, பேருந்து வசதி உள்ளிட்ட பல்வேறு அடிப்படை வசதிகள் வேண்டியும், பட்டா வேண்டுதல், சிட்டா பெயர் மாற்றம், புதிய குடும்ப அட்டை வேண்டுதல், வாரிசு சான்றிதழ், வேலைவாய்ப்பு, இலவச வீட்டுமனை பட்டா, முதியோர் ஓய்வூதியத் தொகை உள்ளிட்ட இதர உதவித் தொகைகள் உட்பட பல்வேறு கோரிக்கைகள் குறித்தும் மற்றும் மாற்றுத்திறனாளிகளுக்கு உதவித்தொகைகள், உதவி உபகரணங்கள் வேண்டியும் மொத்தம் 446 மனுக்கள் வரப்பெற்றன.

பொதுமக்களிடமிருந்து பெறப்பட்ட மனுக்கள் அனைத்தும், சம்மந்தப்பட்ட துறை அலுவலர்களிடம் வழங்கி, நடவடிக்கை மேற்கொண்டு தகுதியான மனுக்களுக்கு உரிய தீர்வினை உடனுக்குடன் வழங்கிட வேண்டுமெனவும், பொதுமக்கள் அளிக்கின்ற கோரிக்கை மனுக்கள் மீது துறை அலுவலர்கள் அரசின் விதிமுறைகளுக்கு உட்பட்டு அதற்கான தீர்வினை விரைந்து காண வேண்டும் எனவும் அலுவலர்களுக்கு உத்தரவிடப்பட்டுள்ளது. இவ்வாறு மாவட்ட ஆட்சித்தலைவர் திருமதி.கி.சாந்தி இஆப., அவர்கள் தெரிவித்தார்கள்.

தமிழ்நாடு நகர்ப்புர வாழ்விட மேம்பாட்டு வாரியத்தின் சார்பில் தருமபுரி மாவட்டத்தை சேர்ந்த 5 மாற்றுத்திறனாளிகள் தமிழ்நாடு நகர்ப்புர வாழ்விட மேம்பாட்டு வாரியத்தால் அடுக்குமாடி குடியிருப்பில் வீடு ஒதுக்கீடு செய்ய செலுத்த வேண்டிய பங்களிப்புத் தொகையாக மொத்தம் ரூ.5,73,255/-ஐ மாவட்ட ஆட்சியரின் விருப்ப நிதியிலிருந்து நிதியுதவியாக அளிக்க கோரி, கோரிக்கை மனு அளித்ததை தொடர்ந்து, இன்றைய தினம் நடைபெற்ற மக்கள் குறைதீர்க்கும் நாள் கூட்டத்தில் 5 மாற்றுத்திறனாளிகளுக்கு அடுக்குமாடி குடியிருப்பு ஒதுக்கீடு செய்ய தேவையான பயனாளியின் பங்களிப்புத்தொகை ரூ.5.73 இலட்சத்தினை (ரூ. 5,73,255/-) மாவட்ட ஆட்சியரின் விருப்ப நிதியிலிருந்து ஒதுக்கி, அடுக்குமாடி குடியிருப்புக்கான பணி ஆணைகளை மாவட்ட ஆட்சித்தலைவர் திருமதி.கி.சாந்தி இஆப., அவர்கள் இன்றைய தினம் வழங்கினார்கள். 

மேலும், மாவட்ட ஆட்சித்தலைவர் திருமதி.கி.சாந்தி இஆப., அவர்கள் முன்னாள் படைவீரர் நலத்துறையின் சார்பில் கொடிநாள் நிதி உதவி அதிகமாக வசூலித்த 4 துறை அலுவலர்களை பாராட்டி, பதக்கங்களை வழங்கினார்கள். இம்மக்கள் குறைதீர்க்கும் நாள் கூட்டத்தில் கூடுதல் ஆட்சியர் (வளர்ச்சி) / மாவட்ட ஊரக வளர்ச்சி முகமை திட்ட இயக்குநர் திரு.கௌரவ்குமார் இஆப., மாவட்ட வருவாய் அலுவலர் திரு. செ. பால்பிரின்ஸ்லி ராஜ்குமார், தனித்துணை ஆட்சியர் (சபாதி) திரு.சையது ஹமீத், மாவட்ட பிற்படுத்தப்பட்டோர் நல அலுவலர் திரு. சையது முகைதீன் இப்ராகிம், மாவட்ட பழங்குடியினர் நல அலுவலர் திரு.பி.எஸ்.கண்ணன், மாவட்ட மாற்றுத்திறனாளிகள் நல அலுவலர் திருமதி.செண்பகவள்ளி, தமிழ்நாடு நகர்ப்புர வாழ்விட மேம்பாட்டு வாரிய இளநிலை பொறியாளர் திரு.சிலம்பரசன் உட்பட தொடர்புடைய அலுவலர்கள் கலந்துகொண்டனர்.