கடன் சுமையால் விபரீதம்: மனைவி, மகளை கொன்றுவிட்டு ஓடும் லாரியில் விழுந்து தற்கொலை செய்த தொழிலதிபர் – தருமபுரியில் பரபரப்பு.

தருமபுரி – ஜூன் 30:

தருமபுரி கோட்டைக்கோவில் அருகே கடன் தொல்லையால் ஏற்பட்ட மனஉளைச்சலில், ரியல் எஸ்டேட் மற்றும் டிரேடிங் தொழில் செய்து வந்த ஒருவர் தனது மனைவி மற்றும் மகளை கொலை செய்துவிட்டு, பின்னர் ஓடும் லாரி முன் பாய்ந்து தற்கொலை செய்து கொண்ட சம்பவம் பெரும் பரபரப்பை ஏற்படுத்தியுள்ளது.

தருமபுரி கோட்டைக்கோவில் பகுதியைச் சேர்ந்த சந்தோஷ் (45) என்பவர் ரியல் எஸ்டேட் மற்றும் டிரேடிங் தொழில் செய்து வந்தார். தொழிலில் ஏற்பட்ட நெருக்கடி மற்றும் கடன் சுமை காரணமாக கடும் மனஉளைச்சலில் இருந்ததாக கூறப்படுகிறது. இந்த நிலையில், வீட்டில் தூங்கிக்கொண்டிருந்த அவரது மனைவி சரண்யா (36) மற்றும் 14 வயது மகள் சாத்விகா ஆகிய இருவரையும் கொடூரமாக கொலை செய்துள்ளார்.

இதனைத் தொடர்ந்து, தனது காரில் வீட்டை விட்டு வெளியேறிய சந்தோஷ், சேலம் – தருமபுரி தேசிய நெடுஞ்சாலையில் புறவடை அருகே சென்றபோது, ஓடிக்கொண்டிருந்த லாரி முன் பாய்ந்து தற்கொலை செய்து கொண்டதாக காவல்துறையினர் தெரிவித்தனர். சம்பவம் குறித்து தகவல் அறிந்த அதியமன்கோட்டை காவல்துறையினர் மற்றும் தருமபுரி டி.எஸ்.பி. தலைமையிலான போலீசார் சம்பவ இடங்களுக்கு விரைந்து சென்று விசாரணை மேற்கொண்டனர். உயிரிழந்த மூவரின் உடல்களும் மீட்கப்பட்டு, தருமபுரி அரசு மருத்துவக் கல்லூரி மருத்துவமனைக்கு உடற்கூராய்விற்காக அனுப்பி வைக்கப்பட்டன.

இந்த சம்பவம் தொடர்பாக காவல்துறையினர் வழக்குப்பதிவு செய்து, கடன் பிரச்சினை, தொழில் நெருக்கடி மற்றும் பிற காரணங்கள் உள்ளிட்ட பல்வேறு கோணங்களில் தீவிர விசாரணை மேற்கொண்டு வருகின்றனர். குடும்பத்தில் மூவர் உயிரிழந்த இந்த சோக சம்பவம் தருமபுரி மாவட்டத்தில் பெரும் அதிர்ச்சியையும் சோகத்தையும் ஏற்படுத்தியுள்ளது.

🟢 தற்கொலை தடுப்பு விழிப்புணர்வு

வாழ்க்கையில் எந்தப் பிரச்சினைக்கும் தற்கொலை ஒரு தீர்வல்ல. கடன் சுமை, மன அழுத்தம், குடும்பப் பிரச்சினை அல்லது நம்பிக்கையிழப்பு போன்ற சூழ்நிலைகளில் இருப்பவர்கள் தயங்காமல் குடும்பத்தினர், நண்பர்கள் அல்லது மனநல நிபுணர்களின் உதவியை நாடுங்கள். சரியான நேரத்தில் கிடைக்கும் ஆதரவு பல உயிர்களைக் காப்பாற்றும்.

உடனடி மனநல ஆலோசனை மற்றும் உதவிக்கு:

• Tele-MANAS (இந்திய அரசு) – 14416 (24×7 இலவச மனநல உதவி)
• Tele-MANAS மாற்று கட்டணமில்லா எண் – 1800-89-14416
• Sneha Suicide Prevention Centre (சென்னை): 044-2464 0050 / 044-2464 0060 (தமிழ் மற்றும் ஆங்கிலத்தில் ஆலோசனை)

நீங்களோ அல்லது உங்களுக்குத் தெரிந்தவரோ உடனடி ஆபத்தில் இருப்பதாகத் தோன்றினால், அருகிலுள்ள அவசர மருத்துவ சேவை அல்லது காவல்துறையை உடனடியாக தொடர்புகொள்ளுங்கள்.