பாலக்கோடு அருகே 2 இளைஞர்கள் விபத்தில் பலி – சாவில் மர்மம் இருப்பதாக கூறி 2 நாட்களாக உடல் வாங்க மறுக்கும் உறவினர்கள்; சாலை மறியல் பரபரப்பு.

தகடூர்குரல் நவம்பர் 28, 2025 0

தருமபுரி – நவம்பர் 29:

தருமபுரி மாவட்டம் பாலக்கோடு அருகே விபத்தில் இரண்டு இளைஞர்கள் உயிரிழந்த சம்பவம், ‘சாவில் மர்மம்’ இருப்பதாக உறவினர்கள் கூறி இரண்டு நாட்களாக உடலை வாங்க மறுத்ததுடன், இன்று சாலை மறியலாக தீவிரமடைந்துள்ளது. சொன்னம்பட்டியை சேர்ந்த கூலி தொழிலாளி நந்தகுமார் மகன் சுனில்குமார் (19) கெலமங்கலத்தில் தனியார் நிறுவனத்தில் பணியாற்றி வந்தார். அதே ஊரை சேர்ந்த ராஜீவ்காந்தி மகன் முருகன் (20) தனியார் பாலிடெக்னிக் கல்லூரியில் 3ஆம் ஆண்டு டிப்ளமோ படித்து வந்தார்.

முன்தினம் இரவு 8 மணிக்கு சுனில்குமார் தனது மொபட்டில் முருகனை உடன் கொண்டு பாலக்கோடு நோக்கி சென்றார். சின்னார்தஅள்ளி கூட்ரோடு அருகே திடீரென ஏற்பட்ட வாகன விபத்தில் இருவரும் சம்பவ இடத்திலேயே உயிரிழந்தனர். தகவல் கிடைத்ததும் பாலக்கோடு போலீசார் உடலை மீட்டு தருமபுரி அரசு மருத்துவமனை சவப்பிரதரணைக்கூடத்திற்கு அனுப்பினர்.

ஆனால் சாவில் மர்மம் இருப்பதாகவும், விபத்து அல்ல–திட்டமிட்டு கொலை செய்திருக்கலாம் என்றும் உறவினர்கள் சந்தேகிக்கின்றனர். குற்றவாளிகளை கைது செய்யுமாறு வலியுறுத்தி, உடலை வாங்க மறுத்து இரண்டாவது நாளாகப் போராட்டத்தில் ஈடுபட்டு வந்தனர். இந்நிலையில் இன்று மாலை அனுமந்தபுரம் சாலையில் 200-க்கும் மேற்பட்ட பொதுமக்கள் திடீர் சாலை மறியல் மேற்கொண்டனர். இதன் காரணமாக வாகன போக்குவரத்து பாதிக்கப்பட்டு அப்பகுதியில் பரபரப்பு நிலவி வருகிறது.

பாலக்கோடு போலீசார் மற்றும் வருவாய் அதிகாரிகள் சம்பவ இடத்தில் நிலைமை பரிசோதித்து பேச்சுவார்த்தை நடத்தி வருகின்றனர்.