தருமபுரி தலித் இளைஞர்களின் மரணம் குறித்து சமூக ஊடகங்களில் பரவும் ‘இரட்டை ஆணவப் படுகொலை’ செய்தி தவறானது

தருமபுரி தலித் இளைஞர்களின் மரணம் குறித்து சமூக ஊடகங்களில் பரவும் ‘இரட்டை ஆணவப் படுகொலை’ செய்தி தவறானது – காவல்துறை விளக்கம்.

தகடூர்குரல் நவம்பர் 28, 2025 0

தருமபுரி, நவ. 28 -

தருமபுரி மாவட்டத்தில் இரண்டு இளைஞர்கள் மரணம் தொடர்பாக சமூக ஊடகங்களில் “தலித் இளைஞர்கள் இரட்டை ஆணவப் படுகொலை” என வெளியாகி சமூக பதற்றத்தை ஏற்படுத்தும் வகையிலான தவறான தகவல்கள் பரவி வருவதை காவல்துறை மறுப்பதுடன், உண்மைத்தன்மை தெரியாமல் போலியான தகவல்களை பகிர வேண்டாமென அறிவுறுத்தியுள்ளது.

காரிமங்கலம் தாலுகா சொர்ணம்பட்டியை சேர்ந்த சுனில்குமார் (18), முருகன் (20) ஆகியோர் 26.11.2025 அன்று மாலை நந்தகுமாரின் இருசக்கர வாகனத்தில் பாலக்கோடு நோக்கி சென்றனர். பின்னர் சிக்காரதனஅள்ளி பாலம் அருகே இருவரும் படுகாயங்களுடன் கிடந்ததாக தகவல் வந்தது. உறவினர்கள் சம்பவ இடத்துக்கு சென்று பார்த்தபோது இருவரும் உயிரிழந்திருந்தனர்.

இருவரின் உடலும் தனியார் ஆம்புலன்ஸ் மூலம் தருமபுரி அரசு மருத்துவமனைக்கு அனுப்பி வைக்கப்பட்டது. பின்னர் சுனில்குமார் தந்தை நந்தகுமார் அளித்த “சந்தேக மரணம்” குறித்த புகாரின் பேரில் பாலக்கோடு காவல் நிலையத்தில் வழக்கு பதிவு செய்யப்பட்டுள்ளது. பிரேத பரிசோதனை முடிக்கப்பட்டும், புலன் விசாரணை நடைபெற்று வருகிறது.

இந்நிலையில், இந்த மரணம் குறித்து சமூக ஊடகங்களில் உண்மைக்குப் புறம்பாக “ஆணவக் கொலை” என தவறான தகவல்கள் பரவுவது விசாரணைக்கு இடையூறு ஏற்படுத்தும் செயல் என காவல்துறை எச்சரிக்கை விடுத்துள்ளது. “உண்மைத்தன்மை வெளியாகாமல், சமூகத்தில் பதட்டத்தை ஏற்படுத்தும் வகையில் தவறான தகவல்களை பதிவேற்றம் செய்ய வேண்டாம்” என அதிகாரப்பூர்வமாக வேண்டுகோள் விடுக்கப்பட்டுள்ளது.