பென்னாகரம் ஏரியூரில் “நலம் காக்கும் ஸ்டாலின்” மருத்துவ முகாம் – ஆட்சித்தலைவர் ரெ. சதீஸ் நேரில் பார்வை; பல நலத்திட்ட உதவிகள் வழங்கல்

தருமபுரி, நவம்பர் 15:

பென்னாகரம் வட்டம், ஏரியூர் ஒன்றியம், அழகாகவுண்டனூர் அதியமான் உயர்நிலைப்பள்ளியில் மருத்துவம் மற்றும் மக்கள் நல்வாழ்வுத் துறை சார்பில் நடைபெற்ற “நலம் காக்கும் ஸ்டாலின்” முழு உடல் பரிசோதனை மருத்துவ முகாமை மாவட்ட ஆட்சித்தலைவர் திரு. ரெ. சதீஸ், இ.ஆ.ப., அவர்கள் இன்று நேரில் பார்வையிட்டு ஆய்வு செய்தார்.

முகாமில் கலந்து கொண்ட மாற்றுத்திறனாளிகள் மற்றும் பழங்குடியினர் மக்களுக்கு அரசு நலத்திட்ட உதவிகள் வழங்கும் நிகழ்வும் நடைபெற்றது. இதில்

• 10 மாற்றுத்திறனாளிகளுக்கு அடையாள அட்டைகள்,

• 15 பழங்குடியின மக்களுக்கு நலவாரிய அடையாள அட்டைகள்,

• 25 கர்ப்பிணி தாய்மார்களுக்கு ஊட்டச்சத்து பெட்டகங்கள்,

• 5 நபர்களுக்கு கலைஞர் மருத்துவ காப்பீட்டு அட்டைகள்

ஆட்சித்தலைவரால் வழங்கப்பட்டன.

தமிழ்நாடு முதலமைச்சரின் ஆணைக்கிணங்க, கடந்த ஆகஸ்டு மாதத்தில் தொடங்கப்பட்ட “நலம் காக்கும் ஸ்டாலின்” உயர் மருத்துவ சேவை முகாம், தருமபுரி மாவட்டத்தில் ஆகஸ்ட் முதல் டிசம்பர் வரை 30 முகாம்கள் நடக்க திட்டமிடப்பட்டுள்ளது. இன்றைய முகாம் காலை 9 மணி முதல் மாலை 4 மணி வரை நடைபெற்றது.

முகாமில் 17 சிறப்பு மருத்துவ பிரிவுகள் — பொது மருத்துவம், எலும்பியல், குழந்தை நலம், இதயநலம், நரம்பியல், நுரையீரல், ENT, பெண்கள் நலம், பல் மருத்துவம், மனநலம் உள்ளிட்ட பல்வேறு பிரிவுகளில் இலவச பரிசோதனைகள் நடைபெற்றன. பரிசோதனைக்காக வந்த அனைத்து நபர்களுக்கும் ABHA கார்டு, CMCHIS மருத்துவ காப்பீட்டு பதிவு, மாற்றுத்திறனாளி சான்றிதழ், கண்புரை அறுவை சிகிச்சை ஏற்பாடு போன்ற சேவைகள் வழங்கப்பட்டன.

மருத்துவ முகாமை பார்வையிட்ட மாவட்ட ஆட்சித்தலைவர், பொதுமக்கள் அனைவரும் இத்தகைய உயர் மருத்துவ சேவைகளை பயன்படுத்திக் கொண்டு பயனடைய வேண்டும் என்று கேட்டுக் கொண்டார். இதனைத் தொடர்ந்து, மோலப்பெல்லூர் தொல்குடி பள்ளியில் ’தேசிய பழங்குடியினர் தினத்தை‘ முன்னிட்டு நடைபெற்ற பல்திறன் போட்டிகளில் வெற்றி பெற்ற பள்ளி மாணவர்களுக்கு கேடயங்கள் மற்றும் பரிசுகளை ஆட்சித்தலைவர் வழங்கினார்.

இந்நிகழ்ச்சியில் பென்னாகரம் சட்டமன்ற உறுப்பினர் ஜி. கே. மணி, துணை இயக்குநர் சுகாதாரம் ராஜேந்திரன், மாவட்ட மாற்றுத்திறனாளிகள் நல அலுவலர் சரவணன், அரசு துறை அலுவலர்கள், ஆசிரியர்கள், மருத்துவர்கள், செவிலியர்கள் மற்றும் பொதுமக்கள் பலர் கலந்து கொண்டனர்.