தருமபுரியில் 455 சுயஉதவிக்குழுக்களுக்கு ரூ.61.75 கோடி வங்கிக் கடன் – 960 பெண்களுக்கு அடையாள அட்டைகள் வழங்கப்பட்டன.

தருமபுரி, செப்டம்பர் 16, 2025 (ஆவணி 31) -

தமிழ்நாடு துணை முதலமைச்சர் திரு. உதயநிதி ஸ்டாலின் அவர்கள், சேலத்தில் நடைபெற்ற நிகழ்ச்சியில் தமிழ்நாடு முழுவதும் உள்ள மகளிர் சுயஉதவிக்குழுக்களுக்கு ரூ.3,500 கோடி வங்கிக் கடன் இணைப்புகளையும் அடையாள அட்டைகளையும் வழங்கினார்.

அதனைத் தொடர்ந்து, தருமபுரி அரசு மருத்துவக்கல்லூரி மருத்துவமனை கலையரங்கில் காணொளி காட்சி மூலம் ஒளிபரப்பப்பட்ட நிகழ்ச்சியில், மாவட்ட ஆட்சித்தலைவர் திரு. ரெ. சதீஸ், இ.ஆ.ப. அவர்கள் கலந்து கொண்டு, 455 சுயஉதவிக்குழுக்களைச் சேர்ந்த 6,735 பெண்களுக்கு ரூ.61.75 கோடி வங்கிக் கடன் வழங்கி, 960 பெண்களுக்கு அடையாள அட்டைகள் வழங்கினார். இந்த நிகழ்ச்சியில், நாடாளுமன்ற உறுப்பினர் திரு. ஆ. மணி அவர்கள் முன்னிலை வகித்தார்.

1989 ஆம் ஆண்டு முத்தமிழறிஞர் கலைஞர் அவர்களின் தலைமையில் தருமபுரியில் தொடங்கிய சுயஉதவிக்குழு இயக்கம், இன்று இந்தியாவிற்கே முன்னுதாரணமாக இருந்து, பிற மாநிலங்களிலும் விரிவடைந்துள்ளது. பெண்களின் பொருளாதார முன்னேற்றமே நாட்டின் முன்னேற்றம் என்ற நோக்கத்துடன், வங்கிக் கடன் இணைப்புகள், சுழல் நிதி, தொழில் வாய்ப்பு ஏற்படுத்தல், சந்தைப்படுத்தல் உள்ளிட்ட பல்வேறு நடவடிக்கைகள் தமிழக அரசால் மேற்கொள்ளப்படுகின்றன.

இன்றைய உதவி வழங்கல், இன்றைய தினம் நடைபெற்ற நிகழ்ச்சியில்,

• சுயஉதவிக்குழுக்களுக்கு வங்கிக் கடன்,

• ஊராட்சி அளவிலான கூட்டமைப்புகளுக்கு பெருங்கடன்,

• சமுதாய முதலீட்டு நிதி,

• சுய வேலைவாய்ப்பு திட்டக் கடன்,

• தனிநபர் தொழில் வங்கிக் கடன்,

• தொழில் குழு வங்கிக் கடன்,

• சுயஉதவிக்குழு அடையாள அட்டைகள் ஆகியவையும் வழங்கப்பட்டன.

இந்நிகழ்ச்சியில், மாநில ஊரக மற்றும் நகர்ப்புற வாழ்வாதார இயக்கம் (மகளிர் திட்டம்) இயக்குநர் திருமதி அ. லலிதா, தருமபுரி நகர்மன்ற தலைவர் திருமதி மா. லட்சுமி நாட்டான், முன்னோடி வங்கி மேலாளர் (இந்தியன் வங்கி) திரு. ராமஜெயம், இணை இயக்குநர் மருத்துவம் மற்றும் ஊரக நலப்பணிகள் மரு. சாந்தி, உதவி மகளிர் திட்ட அலுவலர் திருமதி சந்தோஷம், மகளிர் சுயஉதவிக்குழு உறுப்பினர்கள் மற்றும் பல்வேறு துறை அதிகாரிகள் கலந்து கொண்டனர்.