தர்மபுரி மாவட்டம், பாலக்கோடு அருகே உள்ள கூசுக்கல் கிராமத்தில் அமைந்துள்ள அருள்மிகு ஸ்ரீ செல்வகணபதி திருக்கோவிலில் மகா கும்பாபிஷேக பெருவிழா வெகுவிமர்சையாக மற்றும் பக்தி பரவசத்துடன் நடைபெற்று முடிந்தது. விழா ஏற்பாடுகள் வெள்ளையன் - மங்கம்மாள் குடும்பத்தினர் தலைமையில் சிறப்பாக முன்னெடுக்கப்பட்டது.
கடந்த திங்கட்கிழமை கணபதி ஹோமம் மற்றும் கொடியேற்றத்துடன் திருவிழா தொடங்கியது. விழாவின் முக்கிய நாளான நேற்று அதிகாலை, கலச ஆராதனை, நவகிரக ஹோமம், பஞ்ச சூக்த ஹோமம், துர்கா சகஸ்ரநாமம், மகா சாந்தி ஹோமம், வேத பாராயணம், பூர்ணாஹதி போன்ற ஆன்மிக நிகழ்வுகள் நடைபெற்றன.
பின்னர் யாகசாலையில் அர்ச்சிக்கப்பட்ட புனித நீர் கலசங்களை, கோயில் பிரதான பகுதியிலுள்ள கலசங்களுக்கு ஊற்றி மஹா கும்பாபிஷேகம் நடத்தப்பட்டது. அதன் பின் பக்தர்கள்மீது புனித நீர் தெளிக்கப்பட்டது. இதையடுத்து ஸ்ரீ செல்வகணபதிக்கு அபிஷேகங்கள், பூ அலங்காரம் மற்றும் மகா தீபாராதனை நடைபெற்றது.
பிரதோஷ நேரத்தில் நடைபெற்ற இந்த விசேஷ நிகழ்வில், விக்கரங்கள் சிறப்பு அலங்காரத்தில் பக்தர்களுக்கு அருள் பாலித்தன. எளிமையான முறையிலும் ஆன்மிக ஆனந்தத்துடனும் நடைபெற்ற இந்த விழாவை காண நூற்றுக்கும் மேற்பட்ட பக்தர்கள் திரண்டிருந்தனர்.
இந்த விழாவில் தொழிலதிபர் மூகாம்பிகை கோவிந்தராஜீ, ராஜாமணி சரவணன், பாலக்கோடு போலீஸ் துணை சூப்பிரண்டு மனோகரன், மருத்துவர் பாலகிருஷ்ணன், முன்னாள் பால் உற்பத்தியாளர் கூட்டுறவு சங்க தலைவர் பாலகிருஷ்ணன், மற்றும் பல அரசியல் மற்றும் சமூக பிரமுகர்கள் கலந்து கொண்டனர்.
மேலும், கோயில் நிர்வாக குழுவினரான வெள்ளையன், பழனி, சேகர், முனியப்பன், விஜய் ஆனந்த் ஆகியோரும் விழா ஏற்பாடுகளில் முதன்மையாக பங்கேற்றனர். மகா கும்பாபிஷேக விழாவின் நிறைவு நிகழ்வாக, திரண்டிருந்த அனைத்து பக்தர்களுக்கும் அன்னதானம் வழங்கப்பட்டது, இது பக்தர்களிடையே பாராட்டைப் பெற்றது.
கூசுக்கல் கிராமத்தில் நடைபெற்ற இந்த மஹா கும்பாபிஷேக விழா, பக்தர்களுக்குள் ஆன்மிக சிந்தனையையும், திருநாளின் அமைதியையும் விதைத்தது. வழக்கமான கிராம கோவில் விழாவை விட, மிக சிறப்பாக நடைபெற்ற இந்த நிகழ்வு, அந்தப்பகுதி மக்களின் ஒற்றுமையும், பக்திச் சிந்தனையும் வெளிப்படுத்திய சிறந்த எடுத்துக்காட்டாக அமைந்தது.
%20(1).jpg)
.jpg)
