தருமபுரியில் பார்வைத்திறன் குறைபாடுடையோர் மாணவர்களுக்கு சிறப்பு பள்ளியில் மாணவர் சேர்க்கை அறிவிப்பு.

தருமபுரி, மே 28-

தருமபுரி மாவட்டத்தில் செயல்பட்டு வரும் அரசு பார்வைத்திறன் குறைபாடுடையோருக்கான சிறப்பு பள்ளியில் 2025-2026 கல்வியாண்டிற்கான மாணவர் சேர்க்கை தற்போது நடைபெற்று வருகிறது. இந்த தகவலை மாவட்ட ஆட்சித்தலைவர் திரு. ரெ. சதீஸ், இ.ஆ.ப., வெளியிட்டுள்ளார்.

தருமபுரி மாவட்ட மாற்றுத்திறனாளிகள் நலத்துறையின் கீழ் இலக்கியம்பட்டியில் செயல்படும் இந்த சிறப்பு பள்ளி, அரசு காதுகேளாதோர் மேல்நிலைப்பள்ளி வளாகத்தில் இயங்குகிறது. பார்வையற்ற மற்றும் குறைபார்வையுடைய மாணவ, மாணவியருக்காக உருவாக்கப்பட்டுள்ள இந்தப் பள்ளி, பிரெய்லி எழுத்து முறையில் சிறப்புக் கல்வியை வழங்கி வருகிறது.

இந்தப் பள்ளியில் ஒன்றாம் வகுப்பு முதல் ஐந்தாம் வகுப்பு வரை கல்வி பயிலும் மாணவர்களுக்கு அரசால் முழுமையாக இலவசமாக பல்வேறு நலன்கள் வழங்கப்படுகின்றன. அதில் சீருடை, நாளாந்த உணவு, பாடநூல்கள், மற்றும் பாதுகாப்பான இலவச விடுதி வசதிகள் அடங்கும். மாணவர்களின் அறிவுத்திறன் மேம்பாட்டுக்காக கணினி வழிக் கல்வியும் வழங்கப்படுகிறது.

2025-2026 ஆம் கல்வியாண்டில் 5 முதல் 12 வயதுக்குட்பட்ட பார்வைத் திறன் குறைபாடுடைய சிறுவர்கள் மற்றும் சிறுமிகள் இப்பள்ளியில் சேர்க்கப்பட்டு இந்த நலவசதிகளைப் பெறலாம். இதற்கான விண்ணப்பங்கள் ஏற்கப்பட்டு வருகின்றன. மேலும் தகவலுக்காக, தலைமையாசிரியர் (தொலைபேசி எண்: 95430 25483) அவர்களை தொடர்புகொண்டு, அல்லது பார்வைத்திறன் குறைபாடுடையோருக்கான அரசு தொடக்கப்பள்ளி, இலக்கியம்பட்டி, இராஜாஜி நீச்சல் குளம் அருகில், தருமபுரி – 5 என்ற முகவரியை நேரில் அணுகலாம்.

பார்வைத்திறன் குறைவுடைய குழந்தைகளின் கல்வி மற்றும் வாழ்க்கை தரத்தை உயர்த்தும் நோக்கில் இந்த அறிக்கையை வெளியிட்டு, மாணவர்களை இந்தப் பள்ளியில் சேர்க்க பெற்றோர் மற்றும் பாதுகாவலர்கள் முன்வருமாறு மாவட்ட ஆட்சித்தலைவர் கேட்டுக்கொண்டுள்ளார்.